Kozi ya Wanamabadiliko wa Jamii

Aina ya Kozi

Mtaala kamili wa kuhamasisha na kuelimisha jamii katika ngazi ya chini. Jozi ya nyenzo za kozi zilizotayarishwa tayari kwa ajili yako kupakua na kuendesha shughuli katika jamii yako.

Walengwa

Ngazi ya Chini: Makundi ya dini mbalimbali, jumuiya za kidini, vikundi vya vijana, vikundi vya wanawake, na vikundi vya shule. Hakuna ufahamu wa awali unaohitajika.

Muda: Warsha tisa za ana kwa ana, kila moja ikiwa ya saa mbili

Tumia mtaala mzima wa saa 18 au chagua mada na mazoezi unayoyapenda ili uyajumuishe katika shughuli unazoendesha tayari.

Utangulizi wa Kozi

Kozi ya Wanamabadiliko wa Jamii ni mfululizo wa warsha tisa, zilizoundwa kuwezesha makundi ya watu wazima na vijana kujifunza, kuthamini, na kuendeleza uhuru wa dini au imani (FORB) kwa wote katika jamii zao.
Nyenzo za kozi zinapatikana bure kwa mtu yeyote au shirika lolote kupakua na kutumia kwa namna wanayoona inafaa.

Hapa utapata taarifa kuhusu:

Mbinu ya ufundishaji wa kozi
Malengo ya kozi
Ni nani walengwa wa kozi
Ni nani anaweza kuratibu kozi
Mada zinazoshughulikiwa na kozi

Bofya hapa kupata nyenzo zote za kozi!

Tafuta nyenzo za kozi

Kozi hii inapatikana kwa lugha nyingi – je, lugha yako ipo?

Uwepo wa lugha zote

Mbinu ya Ufundishaji wa Kozi

Mbinu ya ufundishaji wa kozi hii inategemea usimulizi wa hadithi, mawasiliano ya kutazama, na mazoezi shirikishi yanayotegemea uzoefu wa washiriki katika maisha yao, jambo linaloifanya iwe rahisi kutumika hata katika mazingira yenye uelewa mdogo wa kusoma na kuandika.

Nyenzo hizi ni rahisi kubadilishwa kulingana na muktadha wowote na zimejaribiwa kwa mafanikio na waratibu wa ndani waliofanya kazi na washiriki wa dini mbalimbali nchini Nigeria, Tanzania, Jordan, India, na Uswidi, kwa mfano.

Kitu bora zaidi kuhusu kozi hii ni jinsi ilivyoshirikisha na kuendana na masuala yanayowahusu watu, huku ikiwa rahisi kufanywa kwa furaha tele. Ulikuwa uzoefu mzuri sana!

Hidaya Dude

Kituo cha Kidini cha Zanzibar, Tanzania

Malengo ya kozi

Kutusaidia kutambua na kukubali utofauti wetu na katika jamii
Kutufanya tuelewe na kuzikubali haki zetu za binadamu, ikiwa ni pamoja na haki ya uhuru wa dini au imani
Kutambua matatizo yanayohusiana na uhuru wa dini au imani katika jamii zetu
Na kupata njia za kushughulikia matatizo kwa pamoja

Kozi hii inawalenga akina nani?

Kozi ya Wanamabadiliko wa Jamii inalenga watu wa ngazi ya jamii – wale wanaohisi kwamba kuna matatizo yanayohusiana na uhuru wa dini au imani katika jamii zao na wanataka kutafuta njia za kufanya mabadiliko.

Kozi hii haihitaji ujuzi wa awali, uzoefu, au hata kukubaliana na haki za binadamu kutoka kwa washiriki. Kinachohitajika ni mtu kuwa muwazi, awe na shauku ya kusaidia kujenga jamii za amani na usawa, na utayari wa kushiriki katika mchakato shirikishi wa kujifunza na kutafakari.

Imetayarishwa kwa ajili ya vikundi vya watu 12-24 lakini inaweza kubadilishwa ili kufaa vikundi vidogo au vikubwa zaidi.

Nani anaweza kuendesha kozi hii?

Kozi ya Wanamabadiliko wa Jamii ni shirikishi – inajumuisha mazoezi ya vikundi, michezo, hadithi, mijadala, na maigizo pamoja na mawasilisho. Yeyote mwenye uzoefu wa kuendesha mafunzo shirikishi kwa watu wazima na vijana anaweza kuendesha kozi hii. Kinachohitajika zaidi kwa mwezeshaji ni uelewa wa muktadha – uwezo wa kutathmini iwapo mada fulani ni nyeti sana au hatari kwa mijadala, na kurekebisha mchakato ipasavyo, pamoja na uwezo wa kushughulikia mienendo ya kundi endapo masuala nyeti au mvutano utatokea.

Huhitaji kuwa mtaalamu wa haki za binadamu au uhuru wa dini au imani ili kuendesha kozi hii. Habari zote muhimu zinatolewa, ikiwa ni pamoja na maandishi na mawasilisho kuhusu mada zinazohusika. Jukumu la mwezeshaji si kuwa mtaalamu, bali ni kuwaongoza washiriki kupitia mchakato wa kujifunza kwa pamoja.

Nyenzo za kozi

Nyenzo za kozi zinajumuisha mwongozo wa mwezeshaji pamoja na nyenzo zinazofuatana na kila kipindi, kama vile slaidi za PowerPoint, kadi za michezo, mabango, na maandiko ya mawasilisho.

Pata nyenzo zote za kozi hapa.

Muhtasari wa Kozi

MALENGO YA MAFUNZO

Kipindi hiki kinajikita katika kujenga maarifa ya washiriki kuhusu haki zao za binadamu na mtazamo chanya kuelekea haki hizo. Kufikia mwisho wa kipindi, washiriki wataweza:
- kutaja angalau haki sita za binadamu zilizo muhimu kwa maisha yao ya kila siku na kutambua angalau haki moja inayokiukwa katika jamii zao.
- kueleza kwamba haki za binadamu ni muhimu na zinahusiana moja kwa moja na maisha yao ya kila siku, na kwamba kila mtu anaweza kuchangia katika kujenga jamii inayoheshimu na kulinda haki za binadamu.
MALENGO YA MAFUNZO

Kipindi hiki kinazingatia kukuza uelewa wa washiriki na kuthamini thamani ya haki ya binadamu ya uhuru wa mawazo, dhamiri, dini na imani. Kufikia mwisho wa kipindi, washiriki wataweza:
- kueleza kiini cha FORB: haki ya kuwa na, kuchagua/kubadili na kutekeleza mafundisho ya dini au imani bila ubaguzi, kulazimishwa au kufanyiwa vurugu
- kueleza jinsi FORB inavyohusika na maisha yao ya kila siku
- kueleza kwa njia ya msingi kuhusu mipaka ya haki hii, yaani FORB haiwezi kutumiwa kama kisingizio cha kuwadhuru watu wengine.
MALENGO YA MAFUNZO

Kipindi hiki kinalenga kukuza mtazamo chanya kuelekea wale wanaoonekana kuwa “tofauti” na kukuza uwezo wa kutambua fursa na changamoto zinazotokana na utambulisho wa mtu. Mpaka kufikia mwisho wa kipindi, washiriki waweze:
- kutambua kuwa utambulisho wa kidini ni sehemu moja tu ya utambulisho wao na kwamba wana utambulisho na uzoefu wa maisha unaowaunganisha na wengine hata katika jamii zenye tofauti za kidini
- kutambua kuwa vipengele tofauti vya utambulisho wetu vinaweza kuleta fursa au changamoto, na kwamba baadhi ya watu wanakumbana na changamoto nyingi au fursa nyingi kutokana na vipengele hivyo
- kuonyesha mshikamano na wale wanaokumbana na changamoto kwa sababu ya vipengele vya utambulisho wao, na kuelewa umuhimu wa kushirikiana kuvuka tofauti ili kuleta mabadiliko.
MALENGO YA MAFUNZO

Kipindi hiki kinajikita katika kujenga uelewa kuhusu aina mbalimbali za Ukiukwaji wa Uhuru wa Dini au Imani, na hali ya Uhuru wa Dini au Imani kimataifa, pamoja na kuimarisha ujuzi wa kutambua ukiukwaji huo. Mpaka mwisho wa kipindi, washiriki waweze:
- kuelezea aina tofauti za Ukiukwaji wa Uhuru wa Dini au Imani,
- kutambua ukiukwaji wa kawaida wa Uhuru wa Dini au Imani, katika mazingira tata,
- kukiri kwamba watu wa imani zote na wasio na imani wanaathiriwa na Ukiukwaji wa Uhuru wa Dini au Imani, na kuelewa mateso yao na kujenga hali ya ushirikeli
MALENGO YA MAFUNZO

Kipindi hiki kinazingatia kukuza ujuzi wa uchambuzi wa muktadha. Mpaka kufikia mwisho wa kipindi, washiriki wataweza:
- kufafanua matatizo na ukiukwaji wa uhuru wa dini au imani unaowakumba watu na makundi mbalimbali katika jamii yao
- kubainisha jinsi ukiukwaji wa uhuru wa dini au imani unavyoathiri wanawake na wasichana kwa njia tofauti na wanaume na wavulana katika jamii
- kuhisi na kuelewa changamoto zinazowakumba watu wa jamii nyingine wanaoathiriwa na ukiukwaji wa uhuru wa dini au imani.
MALENGO YA MAFUNZO

Vipindi vya 6 na 7 vinazingatia kukuza uelewa kuhusu mbinu za kuhimiza haki za binadamu. Ifikapo mwisho wa vipindi hivi, washiriki watakuwa na uwezo wa:
- kutoa maelezo rahisi ya makundi manne tofauti ya mbinu zinazoweza kutumiwa kuhamasisha haki za binadamu na kutoa mifano ya hatua kwa kila aina
- kuonyesha hamu ya kuhamasisha haki za binadamu katika jamii yao
- kutambua kwa pamoja angalau hatua tano ambazo wanaweza kuchukua kama watu binafsi na hatua tano ambazo vikundi/taasisi wanazoshirikiana nazo zinaweza kuchukua ili kuhamasisha uhuru wa dini au imani katika jamii yao
MALENGO YA MAFUNZO

Kipindi hiki kinazingatia kukuza ujuzi wa kupanga hatua. Kufikia mwisho wa vipindi vya 8 na 9, washiriki wataweza:
- kuandaa mipango rahisi ya utekelezaji wa kukuza uhuru wa dini au imani katika jamii
- kutaja hatua mahususi wanazoweza kuchukua binafsi ili kuhamasisha uhuru wa dini au imani na haki nyinginezo
- kueleza dhamira yao ya kuchukua hatua ili kukuza uhuru wa dini au imani na haki nyinginezo
Pale inapowezekana, washiriki wataweza:
- kutekeleza mipango yao ya utekelezaji baada ya mafunzo

Tunapenda kusikia uzoefu wako wa kutumia nyenzo za kozi kuleta mabadiliko katika jamii yako.

Tuambie hadithi yako!

Fomu ya maoni